ភ្នំពេញ៖ ប្រធានគណបក្សប្រជាជន សម្ដេចតេជោ ហ៊ុន សែន និងអនុប្រធានសភាប្រឹក្សានយោបាយប្រជាជនចិនលោកស្រី ស៊ិន យៀកយៀក បានបង្ហាញពីភាពជឿជាក់លើទំនាក់ទំនងនៃប្រទេសទាំងពីរទោះបីជាពិភពលោកកំពុងប្រឈមនឹងភាពស្មុគស្មាញនៃនយោបាយអន្តរជាតិច្រើន ដោយថាក្នុងឱកាសនេះដែលបង្ហាញពីការប្តេជ្ញាចិត្តបន្តគាំទ្រ គ្នាទៅវិញទៅមក ដើម្បីរក្សាសន្តិភាព ស្ថិរភាព ការអភិវឌ្ឍ និងពង្រឹងនូវទំនាក់ទំនងរវាងប្រជាជននិងប្រជាជន ឱ្យកាន់ស៊ីជម្រៅថែមទៀត។

ការលើកឡើងនេះធ្វើការក្នុងជំនួបរវាងសម្ដេចតេជោ ហ៊ុន សែន និងលោកស្រី ស៊ិន យៀកយៀក នៅវិមាន៧មករា កាលពីថ្ងៃព្រហស្បតិ៍ ទី២៣ ខែវិច្ឆិកា ឆ្នាំ២០២៣ ក្នុងរាជធានីភ្នំពេញ។

ក្នុងជំនួបនេះលោកស្រី ស៊ិន យៀកយៀក បានបញ្ជាក់ថា ទស្សនកិច្ចរបស់លោកស្រីនៅកម្ពុជាលើកនេះ បានជំរុញបន្ថែមទៀតនូវការអនុវត្តកិច្ចសហប្រតិបត្តិការ ជាក់ស្តែងនៅក្នុងការកសាងសហគមន៍ជោគវាសនារួមកម្ពុជា-ចិន ដែលមានគុណភាពខ្ពស់ កម្រិតខ្ពស់ និងស្ដង់ដារខ្ពស់ ក្នុងយុគសម័យថ្មី។

សម្តេចតេជោ ហ៊ុន សែន បានថ្លែងលើកឡើងពីគុណសម្បត្តិរបស់ប្រទេសចិនក្នុងដំណើរចូលរួមអភិវឌ្ឍន៍ប្រទេសកម្ពុជា ដែលជាការរួមចំណែកដល់ការពង្រឹងឯករាជ្យភាពរបស់កម្ពុជា។ សម្ដេចបានអរគុណចំពោះការរួមចំណែកនេះ។

ក្នុងកិច្ចជំនួបនោះដែរភាគីទាំងពីរបានប្ដេជ្ញាបន្តបង្កើននូវសមិទ្ធិផលផ្លែផ្កាជាក់ស្តែងលើ "ច្រករបៀង ឧស្សាហកម្មនិងបច្ចេកវិទ្យា" និង "ច្រករបៀងមច្ឆារ និងអង្គរ" ក្រោមកិច្ចសហប្រតិបត្តិការត្បូងពេជ្រ ដែលថ្នាក់ដឹកនាំនៃប្រទេសទាំងពីរបានឯកភាពគ្នា។ ដោយបានបញ្ជាក់ថា ក្នុងបរិបទដែលនយោបាយអន្តរជាតិកំពុងមានការវិវត្តន៍យ៉ាងស្មុគស្មាញ ភាគីទាំងពីរប្តេជ្ញាចិត្តបន្តគាំទ្រ គ្នាទៅវិញទៅមក ដើម្បីរក្សាសន្តិភាព ស្ថិរភាព ការអភិវឌ្ឍ និងពង្រឹងនូវទំនាក់ទំនងរវាងប្រជាជននិងប្រជាជន ឱ្យកាន់ស៊ីជម្រៅថែមទៀត៕